为啥叫“混堂”

为啥叫“混堂”

老底仔上海人去公共浴室“汏浴”，侪叫“到混堂（whendhang〈名〉浴室）里去”。要是汏好浴再闭目养神，迭种放松心情个享受叫“孵混堂”。

葛末为啥叫“混堂”呢？我个理解蛮形象个，老早男浴室里总有个七、八平方米大，一米深个水池，池子壁下一半地方有一圈台阶，放满水后大人坐辣台阶浪写意（xiayi舒服，称心，愉快）浸泡，小人也可以立辣水池里。水温40摄氏度上下，整个空间雾气腾腾邪气暖热。上海人习惯称比较大个房间为“堂”，会客叫“客堂”、上课叫“课堂”、吃饭叫“食堂”。大家混辣一个水池里汏浴，勿叫“混堂”叫啥呢？

 

另外，因为大水池里个水往往比较浑浊，搿个“浑”跟“混”辣辣上海言话里读音是一样个，迭种腔势（'qiansy〈名〉神态，模样）个地方叫伊“混堂”勿是蛮名正言顺个嘛。

再讲老早多数人家屋里呒没汏浴间，特别过年又是大冷天到混堂里去汏浴暖热，浑身汏汏清爽讨个口彩。噶咾大年夜前两日，混堂生意绝（xhik绝读席、习）对是高峰，每家浴室门口侪轧满男女老少等辣汏浴，乱哄哄赛过是小菜场。我老早住辣老城厢里，东面有西城浴室，西面是西门浴室，原本浴室侪是下半日营业，过年前几天侪是全日开放。因为西门浴室开辣老西门个闹猛户荡（whudhang〈名〉地方），去个人比较多，我反而欢喜去稍许远眼个西城浴室，倒勿是人少，而是搿爿混堂里还有剃头服务，可以“一手一脚（yiksouyikjiak①一个人包下来（做），不转手。②紧接着（做），不拖延）” 连头搭脚（lidhoudakjiak从头到脚）侪弄清爽。

 

当侬走进立满人个水池里，跟熟人打打招呼搓搓（cu初、础、楚、粗、厝、挫、措、锉、错）背也真扎劲，冲淋浴地方还要排队，雾腾腾个赛过辣“庙里烧香，人像插蜡烛”，迭种辰光汏浴勿到混堂里来，到啥地方去呢？

 

混堂里也有勿混个，只要多花眼铜钿，有沙发躺椅，修脚、搓背样样煞清。再想适意有包房、有泡浴缸里汏浴叫“盆汤”，迭眼只好算是混堂里个小部分。随着单位、家庭个汏浴设施完善，混堂就慢慢叫远离我伲了。现代搿排里个日本桑拿、芬兰桑拿搭仔温泉汏浴看起来高级，必过混堂作为曾经个市井生活常常会拨我伲回忆起来。掼（ghue〈动〉扔，丢）勿开个就是“情结”！

 

（2018年11月4日刊于《新民晚报》上海闲话版）

 

作者侯宝良老师简介

侯宝良中国散文学会会员、上海市作家协会会员,经济师职称。

散文、随笔、故事作品散见于上海及各地的报刊、杂志和电台。在《新民晚报》各版面已刊载了一百多篇的文章，汇集出版了《我和飞燕有个约》，先后出版了散文集《弹街路》《弹街路续集》《申情难忘》，评论集《孰是孰非》。

多年来参与国内各类征文，其中《德娥》、《莲芸祈福》荣获第十六届、十八届中国月饼文化节征文的“一等奖”；《凝固的记忆》、《世博人家》、《三气定忠魂》《上海书展为我写好“上海闲话”》等先后获得上海移动十周年征文、上海“世博会”征文、上海第十七届读书节征文以及上海书展十周年征文的“二等奖”，还获得上海十六届国际艺术节、2017年第二十届上海国际电影节等的“最佳作品”奖、《做生活的强者》获2018年上海市民文化节改革开放四十年阅读中真善美征文的“十佳作品”。

作者：侯宝良老师