 沪语朗读：顾天虹 出租车个祖师爷——黄包车 作者：王国杰 改编、推荐：丁迪蒙 朗读：顾天虹 今朝要搭各位讲讲出租车个祖师爷。 有人讲，出租车还有祖师爷个？侬牛皮吹豁边了！葛末我要讲唻，上海滩勒勒开埠以后是先有电车搭仔轿车个，不过埃个辰光祥生出租汽车公司还呒没出世，黄包车当然就成了风头十足个出租车。 搿能介讲起来，黄包车阿是出租车个祖师爷啊？或许有听众要讲了：“黄包车有啥稀奇，阿拉勒勒风景区老早就坐过了，一眼也勿扎劲个！”乃末侬弄错脱了，现在摆勒上海老街里向个黄包车是摆摆功架个，黄包车浪坐个翘起二郎腿个旗袍小姐，大家来拍张小照，侪当仔迭个就是的的刮刮老上海个风情唻！其实，搿眼做摆设个黄包车是呒没看到过老早黄包车个师傅做出来个，已经完全走样唻。 今朝阿拉搭侬讲讲49年前头个黄包车，侬就会明白，哦，黄包车原来还有介许多名堂经啊！ 侬勿要看勿起黄包车，埃个辰光坐黄包车算是交关吃价唻！老底子穷人是坐勿起黄包车个，黄包车是有铜钿人家个太太、小姐搭仔一班勒大公司里坐写字间个洋行大班，还有青楼妓女再坐得起个哦！还有就是说书先生搭仔唱戏个艺人，伊拉也是有条件坐黄包车去赶场子个。据说当年洋行大班等高层人士坐到黃包車浪，还派头一落，伊拉勿搭车夫讲拉到啥地方去个，而是用司的克敲車子，来搭车夫讲朝啥地方拉。敲左就是要朝左拉，敲右要朝右拉，敲踏板就是叫停。还有一种大老板，屋里向已经有得自备汽车了，为了赶时髦，再要包一部嚓刮勒新个黄包车，一般侪漆成宝蓝颜色，再装好考究个车铃，有个还要拿拉杆抛光，赤刮斯亮，叫车夫停勒大门口随时备用。据统计，到抗战个前夜，上海已经有得八万多部黄包车了。 搿末黄包车到底是啥个辰光行出来个呢？其实，黄包车老里八早叫“东洋车”。勒勒一百多年前个清朝，有个法国人从日本引进一批东洋车到上海，开了一爿东洋车行，招募外地到上海来寻生活个穷人当车夫。后来，有关方面规定，出租用个东洋车一律漆成功黄颜色，搿能一来末，老百姓就叫伊黄包车了。 为啥搿个辰光有钞票人介欢喜乘黄包车？搿是因为埃个年代轿车还呒没普及，还有蛮多地方勿通电车，黄包车呢，倒是特别灵活，好穿小马路、小弄堂，拉到阿里停到阿里，交关便当。再讲，黄包车个轮盘斜气大，乘勒上头有点像乘马车，交关稳当。黄包车个座位呢，是比较小个，只好坐一个大人，要是位子大，坐两个大人个闲话，车夫就会拉勿动。搿能一来末，一个人坐勒上头还好笃悠悠个跷跷二郎腿，别转头望望野眼。 或许有朋友会讲，侬瞎话三千，黄包车明明好坐两个人。搿末我要搭侬讲唻，搿个是后首来为了方便游客浏览风景区，模仿三轮车个两人座，车夫是拉仔车子慢吞吞走路个，用勿着花大力气穷奔阿二头个，故所以勿是老早原式原样个黄包车了。 还有，就是车夫服务周到。要是碰着落雨个日脚，或者热天介日头辣豁豁，车夫就会拿车蓬撑起来；要是风大呢，车夫又会拿出一条毛毯盖勒侬个脚馒头浪，让侬个两只脚吹勿着风，服务可以讲是蛮道地个。黄包车夫拎起拉杆，靠背就会朝后头倾斜，就像现在热天介乘风凉个藤交椅，隑勒靠背浪阿是写意得覅去话伊了？但不过言话要讲转来，黄包车夫日晒雨淋，无论是热得要死个夏天还去冷煞脱人个冬天侪要日夜奔波个。我还亲眼看到过马路浪个巡捕拿仔警棍驱赶黄包车夫，可见搿个辰光个黄包车夫日脚过得是邪气辛酸，葛老49年以后黄包车就退出历史舞台了。 小辰光大人带我出去走亲眷，我顶顶开心个就是勒马路边浪向伸出小手抢勒招呼黄包车。讲拨侬听或许侬勿相信，挨个辰光勒勒马路浪喊一声：“黄包车！”要比现在伸手拦“差头“好好叫有派头唻。侬喊一声：“黄包车！”马上就会得有几个黄包车夫来抢生意。 小辰光，我勒勒八仙桥附近读小学。后首来阿拉搬场，住到北京西路去了。搿末哪能介去上课呢？正巧，弄堂里有个大户人家有部私人黄包车个，阿拉爷娘就搭黄包车夫商量，请伊每日天早浪向送我到八仙桥去上课，放学辰光再去接我回转来。照现在个讲法，搿个车夫就是钟点工，乘老板勿晓得，出点外快。 每日早浪向，我就等勒自家阳台浪，看见车夫勒勒下头朝我招手，我就奔下去去跳上车子。车夫是个长脚，伊慢慢叫拎起横竿，我朝后头靠背浪一隑，嗨嗨，适意，适意！出了弄堂，“长脚”摇两记车铃，大步子一跨，眼门前个楼房行人侪像飞一样个朝后头退出去。 前几年，我到南京夫子庙白相，看到秦淮河边头有一长排黄包车，一种怀旧个感情升起来了。我也顾勿上贵勿贵，快点坐上去，乘勒黄包车游览。埃个车夫一步也呒没奔，而是荡发荡发，笃悠悠，慢吞吞，算是似懂非懂个搭我讲解了一眼景点，黄包车个味道一眼也呒没坐出来，搿个车夫荡了廿分钟马路，居然还收了我一百元洋钿！ 现在，一旦社会浪搞老上海怀旧活动，黄包车就成了演出个道具。寻个漂亮个妹妹，着好旗袍高跟皮鞋，扭扭腰，笑咪咪个坐勒黄包车浪，翘起二郎腿摆姿势。要是侬问问搿个妹妹，坐黄包车是啥个味道？包伊两只眼睛木觉觉，呆瞪瞪，一面孔戆噱噱。
|
|
|
来自： 渺渺m69vnzsah9 > 《待分类》
