 福建人比较好吃？ 福建F和H分不清？ …… 近年来，我大胡建的梗频出不断 那么，“福建人比较聪明” 这种说法到底有影没影呢🤔 今日方言观察， 和你一起科学话仙！   我解记得在本咧读大学个时节，长期看见网顶有文章说福建侬野巧，野爻做生理，是啥乜中国个“犹太侬”。我迄时袂啥晓得，感觉说加减有淡薄道理。不句随着年龄个增长，知识面变较广，最近带网顶又各看着类似个文章，第一反应是： 较卜吐🤮 长期以来，有野侪侬认为中国侬里兜，有个所在巧，有个所在戆，迹导致经济发展程度无相同。即种想法是完全错误个🙅。中国内部个经济不平衡，主要是因为生产力进步伫无同个地理环境下骹体现出无相同个作用。  所有侬都知影说华夏文明起源于黄河流域。不句为啥乜华夏文明无起源于今旦日各较富裕个江淮地区啊，我相信有个侬解认为说是偶然个因素。但是，咱那用生产力个角度来看，就感觉说黄河流域个文明解先发展起来，是必然个。伫青铜器时代合铁器时代个早期，相对于江淮地区来说，半湿润各半干旱个黄河流域地区土壤较松，较好开垦，所以中国个农业文明迹解发源于黄河流域👨🌾。 等哑遘铁器个改进合其他相应器械进步了后🔨，中国侬迹开始有能力通开发南方个土地。江淮一带地区开发了后，南方逐渐变成咱中国粮食个主产区，南方个经济、文化、教育迹逐渐超过北方。  不句，种个进步，上开始亦无意味着福建解有啥大发展，因为福建山侪，塍地少⛰️，无法度孤单依靠土地开垦来发展地方个经济。即个时节，海上丝绸之路个兴起，度福建带来机会。中国合西方（包括整个西亚合欧洲），上早个经济交流，主要通过陆上个丝绸之路，因为早期，比如说汉朝，世界造船业无啥发达，行陆上丝绸之路，只卜无战争，整体上是野方便个。 陆上丝绸之路商业个发展，度今旦日中国西部、中亚个发展带来野大个帮助。不句中晚唐之后，陆上丝绸之路因为战争出现一定个衰弱，加上世界造船技术个进步，度海运变了各较方便。所以按唐朝后期开始，海上丝绸之路开始兴起⛵️，度山也侪、塍地野少个福建地区带来新个机会，福建个经济愈来愈发展，遘宋朝就野好唠。经济发展带来文化教育个发展，所以咱福建伫宋朝迹有法度通出喝侪宰相。整体上，宋朝个福建，已经是国家个核心地区，无算边陲唠。  改革开放以来，中国个沿海比里陆发展较早、较好，合种个地理位置亦是有野大个关系。改革开放前三十年，中国个内需无啥大，主要发展出口经济。出口行海运上利便，因为海运比陆运加俗万侪，里陆那卜出口物件，着先运遘沿海，迹行船出去，成本加野悬。就是即个原因，福建沿海个经济迹解先发展起来🚢。 经济发展文化迹解发展，而文化发展教育迹解发展👨🏫。我做简仔个时节，发现说江苏、浙江、安徽拙个所在个文化教育比中国其他所在较发达，想说不知是因比咱较巧哖。尾手迹知影说，因个文教发达是因为近代经济较发达。即满江苏、浙江经济夭原在野好。  说着犹太侬，因之所以看起来较巧，亦是因为因从事商业活动，较好额，简仔接受个教育较好，迹比欧洲其他民族较巧。种个巧，是钱变个💰，不是说基因顶骹就比侬较巧。 所以说，福建侬无较巧侬，只是说现在个经济环境对沿海有利，咱经济迹较好，百姓接触各种事物个机会迹较侪。 随着中国内需个发展，沿海地区个经济因为先发优势，解长期领先，即个领先过程需要咱冷静来看待。其实，我一直感觉说，福建个后生家着加去里陆，加去北方，去了解经济比咱较差个所在，拙个所在个经济比咱较落后，不是因为因戆，不是因为因臭骨，是因为因比咱机会较少。咱着去理解因、帮助因，而不是歧视因。  就算汝是蜀个野自私野自私个侬，汝想看迈咧，里陆经济无发展，对福建其实是野不利个，福建个粮食卜对叨落来啊？福建个产品卜对叨落去啊？想清楚拙个问题，汝那原在徛伫高高在上个位置，想说家己是“高等华人”，看无里陆个“穷亲情”，我同款亦—— 看汝野衰潲🙄️。 本内容为作者独立观点，不代表本平台立场 不知道各位能够听懂、看懂多少呢🤔 |
|
|
