|
普通话只是北京闲话
▲江子澄 摄于江阴滩里  普通话个定义是以北京语音为标准音，以北方方言为基础方言，以典范个现代白话文著作为语法规范个现代汉民族个共同语。不错，渠是共同语，来源于北京闲话而高于北京闲话，但从某种意义上来讲，渠还是北京闲话，忑全国千千万万个地点所使用个当地个汉语一样，侪是从古汉语传下来个，互相之间侪是弟兄姊妹，是同辈。北京闲话不是爷。但一方面大家不了解古汉语，不晓得本地汉语忑古汉语个对应关系，还一方面受片面推广北京闲话个影响，误认为本地老人传下来个所谓土话侪是错误个、不标准个、应该摈弃个，拿本地汉语个标准去寻到北京闲话身上去啧，轧实昰个然可是塱拿兄弟当成功爷！ 每种语言侪是一个统称，一个抽象个概念，具体到每个使用昰种语言个人，渠讲出来个一定是渠伊个地方个方言，北京人讲出来个是北京闲话，上海人讲出来个是上海闲话，广州人讲出来个是广州闲话。就像树是一个统称，但具体到每棵树一定是某一具体品种个树，杨树、柳树、松树、柏树，一棵树不可能又是昰种树又是伊种树。汉语传承至今，每个地点个闲话侪忑古汉语，特别是一千多年前头中古时期个汉语有齐整个对应关系，只是侪简化著交关。 中古汉语声母有36只，如帮滂並明、端透定泥嘞铤当时称为36母；韵母有90几只，虽然当时称为206韵，但因为古代拿声调不同也算成功不同个韵母，个嘞实际上是90几只；声调有8只，平上去入各分阴阳，称为四声八调。 现代北京闲话声母21只，韵母39只，声调4只。 现代嘉定闲话声母27只，韵母46只，声调6只。 相对古汉语来讲各地声、韵、调侪有所合并，只是大家个分合情况有所不同。譬如北京闲话清浊音合并：布=步，到=道，贵=跪。长短音合并：衣=一，路=陆，时=实。尖团音合并：津=金，箭=剑，小=晓。古汉语个清浊音、长短音、尖团音嘉定闲话原旧分得清爽垃许。但嘉定闲话平翘舌音合并：资=支，词=池，斯=诗。前后鼻音合并：津=精，陈=成，神=绳。古汉语个平翘舌音、前后鼻音北京闲话原旧分得清爽垃许。当然有排朋友也晓得，古汉语鼻音分前中后三套，北京闲话也倂得只有两套啧。但广州闲话里古汉语个前中后三套鼻音原旧完整保留垃许。 个嘞佷覅一看北京闲话里读音一样，就当得自家本地汉语里乡读音不一样是错误个。譬如：甘甜、柑橘、泔脚，嘉定闲话侪读kie1，菜干、心肝、竹竿，嘉定闲话侪读koe1，前头三个是中古汉语咸摄开口一等字，后头三个是山摄开口一等字，古代就是两只韵母个。弓长张，立早章；羌族个羌，口腔个腔；发现个现，贡献个献；绒线个绒，荣光个荣……可以讲横北京闲话读出来一样但垃佷当地个汉语里乡读出来不一样个，侪极有可能是塱古汉语里本来就不一样垃许，只是正好邋北京闲话里合倂脱啧。当然也有一排字垃佷当地个汉语里合倂脱啧，但塱北京闲话里原像古汉语恁有能区分垃许。个嘞，学习古汉语，特别是古汉语语音，佷会个汉语种类越多越轻松，因为有排古汉语特征塱昰支现代汉语里保存垃许，有排古汉语特征塱还一支现代汉语里保存垃许。北京闲话只是其中个一支。 垃我不懂汉语历史音韵学个辰光，我只是有寔恁个意识：“我是嘉定县华亭乡个人，我要学好我伲嘉定华亭个母语。”乃么紧跟老一代，多听，多问，一个字一个字，一个词一个词，逐积逐累。垃塱交关人看不起我伲乡下人、乡下闲话个社会环境里原旧乡音无改。当时只是简单个想：“我是乡下人，我要保留好我伲乡下头个老古闲话。”结果朆限着话学汉语历史音韵学个辰光傍其他同学轻松脱交关！一是乡下闲话常常比街上闲话变化慢，个嘞保留个古代特征比较多，但更加重要个是，我敢于坚持忑确认我伲本乡本土个读音而不是用北京闲话个标准来套本地读音，个嘞我嘉定华亭闲话个读音忑古汉语蜪个对应规律是相当齐整个。譬如：长枪个枪是tshian1，姓氏羌是chian1，口腔个腔是chiaon1，老早我只晓得跟老人寔恁读，学著汉语语音史，乃么晓得，枪是清母字，羌是晓母字，个嘞声母不同；羌是宕摄开口三等阳韵字，腔是江摄开口二等江韵字，自古韵母不同。 回答个答读teh7，容纳个纳读neh8，杂乱个杂读zeh8，忑宝塔个塔，坍塌个塌，蜡烛个蜡韵母不一样，反映著古代咸摄开口一等合韵忑盍韵昰两只韵母本来是不同个。道琼斯指数个琼，也就是海南省个简称，读jin2，不读jion2，原来渠忑倾斜个倾，营长个营古代是同一个韵母个，侪是梗摄合口三等清韵字。 相向像项，北京闲话侪读xiang5，但嘉定闲话一读，相是心母字，向是晓母字，像是邪母字，项是匣母字，外加是江摄开口二等字，个嘞忑前头三个宕摄开口三等字韵母也还不一样嘞！寔恁个例子比比皆是！个嘞我记古代个读音便当脱交关，交关字我用嘉定闲话一读就晓得古代个音韵地位啧。以至于我个【弍两】个同学惊叹话嘉定闲话是仅次于温州闲话个中国第二结棍个闲话。温州闲话因为渠个古老，推算古汉语语音相当便捷，个嘞作兴为此著寔恁嘞温州地区音韵学家、方言学家辈出，塱语言学界享有盛名。 但我晓得，嘉定闲话实际上大古是也不古透，近边个崇明、松江、常熟嘞铤闲话还要古老，只是因为我尽最大可能【汤/手】牢著北京闲话个影响，保持著自家嘉定闲话个完整性，个嘞忑古汉语蜪对应齐整，学起来就便当啧。 个咾，佷覅当著一条溪流个溪，北京闲话读xi1，我伲读chi1就是错误个，实际上相当标准！渠本来就是中古汉语个溪母字，忑“牵巧羌恰”一个声母个。南翔槎溪、太仓沙溪，昰排侪是本地地名，自古传下来就是读chi1个，老人绝对朆读错脱！北京闲话按照古今对应规律也应该读qi1个，估计是认字认半边读错脱啧，大家积非成是，约定俗成啧，乃么也就推广到全国啧。鲸鱼个鲸，北京闲话读jing1，乃么佷当著本地汉语也是读清音cin1，阿是？实际上老人传下来是读jin2个！相当正确！渠是中古梗摄开口三等庚韵群母平声字，嘉定读jin2完全符合古今对应规律。照规律，北京闲话应该读成功qing2个，但作兴也是认字认半边读错脱啧。 还有像硕士研究生个硕，佷从北京闲话个读音去推测本地汉语个读音估计到死也推不出来。实际上老人传下来就是读zah8或者zeh8个，相当正确！嘉定大众工业学堂抄东南个和硕路，老人就是读和zah8路个。渠是中古梗摄开口三等昔韵禅母入声字，忑石头个石自古就是同音字。1900年前头东汉个《说文解字》就记得清清爽爽：“碩，頭大也。从頁石聲。常隻切。”就是讲硕是形声字，渠个声旁就是石头个石，渠个读音是常个声母拼隻个韵母忑声调，也就是z+ah=zah。塱所谓个嘉定土闲话里到喃原好忑将近两千年前头个汉语读音对得起来，但昰个字塱现代北京闲话里乡虽然从声母上还有能看出来忑石头个石有关系，但因为古汉语个浊音、短音塱现代北京闲话里侪呒不啧，个嘞古代标注读音个方式——反切，也就是用前头一个字个声母拼后头一个字个韵母忑声调，塱北京闲话里乡常常不适用啧，譬如硕士个硕，常隻切，用北京读音读常隻切，ch+i1=chi1忑北京闲话实际个读音shuo5完全不一样啧。但作兴是现在个小青年只晓得汉字个北京闲话读音，乃么忑老人用本地汉语交流个辰光仿照北京音来硬推，读成功soh7，听个老人不晓得何里个字么也跟著寔恁话，乃么soh7士倒行开啧。但还是有一部分识字个老人读zah8士或者文读zeh8士。 还有像佩服不读pheu5服，叛徒不读phie5徒，昰两个侪是並母字，现代吴语原旧忑古汉语一样读混浊个b声母。古汉语个浊声母字塱现代北京闲话里应该是平声送气，仄声不送气，如：平、病，北京分别读ping2，bing5；停、定，北京分别读ting2，ding5；琴、近，北京分别读qin2，jin5。名分账佩服北京闲话应该读bei5服，叛徒北京闲话应该读ban5徒，但不晓得哪恁昰两个仄声字竟然也送气啧，不符合规则啧，乃么侺还用北京闲话里不规则个读音来否定自家本地汉语里乡规则个正确读音。实在是犯著拿兄弟当爷个错误。 寔恁个例子还有交关。总数，就是希望大家晓得，普通话只是北京闲话，虽然渠也垃北京土闲话个基础上有所加工，但不管哪恁，渠个音系就是北京闲话个音系，忑全国各个地方个闲话一样，侪是从古汉语来个，大家侪是古汉语个子孙，是同辈。各个地点个汉语，不管是一座大城市还是一个乡村（本该读“镇”）、一个村宅个土闲话，总体上侪是忑古汉语有齐整个对应规律个，只是大家变化个动态可能不一样，譬如古汉语ABCD四只韵母，可能佷AB合倂，我BC合倂，渠CD合倂。当然包括北京垃许各地侪会有一眼不规则个变化，只是有【弍两】个字佷规则我不规则，有【弍两】个字我规则佷不规则。总数，就是侺家乡昰支汉语个标准不是北京闲话，覅畀普通话昰只名头迷惑脱，当著渠是佷个根，昰个是塱拿兄弟当爷。各地个闲话，总体个标准是从古汉语传下来个，当然也会有少部分常用字个读音不符合古今对应规律，但也已经约定俗成啧，昰排也可以保留。 有人可能要问：“个我不晓得古汉语读音，不晓得本地汉语忑古汉语个传承关系，只晓得字典上畀我伲个北京闲话读音，个哪恁办？”我个建议就是：【情愿】可相信本地老人个读音，也覅去用字典上个北京音硬推。譬如：波涛汹涌个涛，老人读dau2，相当正确，渠本来就是古代个定母字，声母读d，北京闲话按规则也应该读tao2。纯粹个粹，老人读sae5，相当正确，渠本来就是古代个心母字，声母忑心一样是s，北京闲话按规则也应该读sui5。痉挛个痉，老人读jin4，相当正确，渠本来就是古代个群母字，声母是混浊个j，北京闲话读jing5也符合规则，但是因为北京闲话里读去声调，也就是大家俗称第四声个字里乡既有交关古代个清声母字，又有交关古代个浊声母字，譬如清声母个敬，浊声母个静、竞，塱北京闲话里侪读jing5，个嘞佷从北京闲话里来推测本地个读音是吃不准哪恁读个。昰排字个本地读音侪是我亲耳朵管听见个，外加通过网上乡个《汉典》《康熙字典》、东方语言学网个古音查询系统，再加上手头记录著常用汉字古汉语音韵地位个《方言调查字表》，一查古汉语读音，侪是清清爽爽符合古今对应规律个。 个嘞，一个字塱本地汉语个读音，多听听老人哪恁话，覅以北京闲话为依据去指责老人读不来、不识字。不晓得阿有囡庶会寔恁对老人话：“爷爷你怎么这个字都读不来！这个字普通话明明读ying5嘛！你怎么会读成ngan6呢？”乃么叫真正不晓得，不识字个不是佷耷阿公，恰恰相反，就是佷自家。软硬个硬，本地汉语读ngan6，基本上忑一千年前头个汉语一样。硬是形声字，声旁就是沉更半夜个更，更、硬，谐声关系清清爽爽，可以讲是活生生个古汉语，只是昰个字塱北京闲话里发生著比较大个变化，乃么佷以北京闲话为标准么当著本地老人闲话也讲不来，轧实渠【土耷】讲个是相当标准个汉语！只是渠【土耷】讲个昰支标准个汉语通行范围比较小，不像北京闲话，取得著国家通用语个地位。 讲得寔恁多，希望大家晓得我伲所谓个土闲话侪是有标准，有根基个！侪是忑古代浩如烟海个汉语典籍有直接个传承关系个，有齐整个对应规律个！佷咬准著常用字个本地读音，随便来何里个冷门字侪可以通过查询渠个古代读音来推出渠垃佷昰滩户荡个读音。譬假讲，属于中古汉语宕摄开口一等铎韵见母入声字：各位个各，阁楼个阁，耽搁个搁，现代嘉定闲话侪读kaoh7，个么不管佷看见何里个字，只要渠属于昰只音韵地位个，就是读kaoh7。因为属于相同音韵地位，说明渠【土耷】塱古代本来就是同音个。大家作兴一碰着啥个冷门字就去翻《新华字典》或者《现代汉语词典》，【阿曾】想过歇？为啥寔个些儿些儿汉字侪用北京闲话个读音标注好啧？话特北京人本事恁个大？啥侪识字人？啥几万汉字侪认得？不也是语言文字工作者通过北京闲话常用字忑古汉语个对应关系拿成千上万个冷门字推出来个咾！ 个嘞大家要晓得，北京闲话可以做到个，大家各地个汉语侪可以做到！北京闲话可以唱歌，各地汉语也可以，粤语歌曲不就蛮行个咾？！北京闲话可以读书，各地汉语也可以，我要用嘉定华亭个语音读古文，碰着冷门字只要查查《康熙字典》，对应相当齐整，一查就好晓得嘉定华亭哪恁读；北京闲话可以写出来，何上个汉语呒能写出来？！绝大多数词语侪是可以通过本地汉语忒古汉语个对应规律以及音变规律寻着本字个，就算暂时寻不着本字，用个符合音韵地位个同音字替代记录就可以。佷作兴要急叫啧：“昰个不就是错别字咾？！”个么请佷解释，北京闲话里“什么”是啥啊？“灰不溜秋”个“不溜秋”是啥啊？还有古代几千年视为经典个文言文里个通假字是啥啊？不侪是拣著【弍两】个同音字记录个咾？约定俗成就可以啧，大家读错脱个字啥还少咾？ 总数，希望大家重新认识普通话。拿北京闲话经过加工推广到全国沟通东西南北，昰个无疑是有积极意义个。但人覅盲目个跟从权威，覅看见兄弟强大著就当渠爷啧。兄弟嬲强，毕竟只是兄弟，忑我伲是一辈个。希望佷不管来自何里个户荡，不管是大都市嗫小乡村，侪自信一眼！侺讲个昰支闲话同样是标标准准个汉语！覅让汉语昰棵枝繁叶茂个大树阿末脚毻得独剩北京闲话昰一萌叶头！ 疁·浏河长江 2014-8-13 礼拜三 甲午年 七月十八 朗读：疁·浏河长江 排版：神死恸瞑 本平台暂未开通评论，大家可至吴语学堂微博留言： 新浪微博：吴语学堂微博 你还可以通过以下方式联系我们： 投稿信箱| wugniu@126.com |
|
|
