|
我乃桃花坞是也，弗错，搿个住仔桃花仙人个桃花庵就勒我该搭。捺亨，我个名字阿是亦美丽亦浪漫。  作兴大家晓得我，侪是因为江南四大才子之一个唐伯虎拨我写个该首《桃花庵歌》：  唐寅，字伯虎，俚搭仇英、沈周、文徵明历来备受推崇，世称“吴门四家”，开仔一代“吴门画派”之先锋。他吟诗作画、博学多才，亦风流万种、狂放不羁，16岁中秀才，29岁个辰光参加乡试一举得头名“解元”。  但不过就是实梗一个江南第一风流才子，勒海参加会试就要功成名就个辰光，倒是因为科场舞弊案受着无端牵连，从此断仔仕途。 换做旁人，作兴就此沉沦哉，不过俚是才华横溢个唐伯虎啊，加之狂放不羁个性格，俚索性放舟南下，回到俚个家乡吴中，勒海苏州城西北，也就是我桃花坞个地盘-----双荷花池西侧买仔一块地造起仔别墅。  院落当中设有桃花庵、学圃堂、梦墨亭、读书阁、蛱蝶斋、检斋、寤歌斋，还遍植花木，特别是桃树，成片个桃林，宛如仙境。 搿辰光个唐伯虎早已看透仔官场炎凉，退避桃花坞，自号“桃花庵主”，还拨新别墅写下仔《桃花庵歌》，自此，桃花仙人勒我个地盘风流一生。  明 唐寅《事茗图》局部，北京故宫博物院 大家阿晓得，能够吸引到该个江南第一风流才子前来个我是着着弗一般呢。 勒最初我无不名字个，自从伍子胥象天法地造姑苏城以来，我该个城市西北角一直比较荒凉，遍布湿地，杂草丛生，少有人住。 后首来到仔汉代，有个张长史勒海该搭种仔成片个桑树，用来养蚕宝宝。 到仔唐宋两代，达官贵人开始勒我该搭购置别业、开辟庄园。唐代有孙园，宋代有五亩园，内有梅坞、桃林。 到该辰光，我终于名扬四方哉。大批文人墨客过来赏花游乐，还拨我取仔“桃花坞”实梗雅致个名字。  明 陈淳《桃花坞图》 我还被推为“姑苏八景”之一，有行情行市个文人赋诗来赞颂我。范石湖有《和章秀才北城新圃》诗云：“方游桃花坞，窈窕入壶天。碧城当岩岫，清湾如涧泉。风月欲无价，聊费四万钱。雪后春事起，红云蜂蝶边。” 捺亨？当时辰光个我可谓是风光无限、盛况空前吧。 但不过啊，历史像煞欢喜搭我溜孛相，历经仔实梗繁华个岁月，正值我意气风发之时，“靖康之难”爆发哉。  金兵入侵，整个姑苏城个老百姓侪勒我该搭安营扎寨，拿我当作最后个防线。 但不过我实梗个江南温婉地，哪搭抵得住搿点草原狼个进攻啊！一时间金兵破寨，屠城数十万，离开个辰光一把火烧仔五日五夜，整个苏州城片甲不留，数十万个百姓也勒我个身躯浪拨屠戮殆尽。 搿是勒海南宋建炎四年，搿个一夜我个身躯鲜血纵横，史称“建炎之夜”。  该以后个数百年时间里，我侪难以恢复唐宋之盛况。 幸运个是，三百余年后，我等来仔唐伯虎。 慢慢叫个，百姓亦开始过来置业，俚笃晓得我个过往，搿勒亦勒我身周围遍植桃树。一时辰光，曾经个我，搿个满目芬芳个桃花坞，重现哉。 再后来到仔清代，为仔我搭搿个最是红尘一二等富贵风流地个阊门相连勒，从此是街巷纵横、坊肆相连，一派繁荣个景象。  清 徐扬 《姑苏繁华图》局部，辽宁省博物馆 后首来因为太平天国运动，我亦受着牵连，但不过即便如此，我还是顽强个生存下来哉。 外加原本住勒阊门外头个手工艺人因为战乱纷纷迁入城内，聚集勒我该搭，一时间我从当初搿个世外桃源成为仔市井气息最浓个手工艺聚集区，雕刻、竹木、纸扇、色纸等等姑苏再有个精致工艺品侪勒我该搭诞生。 该个当中亦以木刻年画最为出名。  清 苏州桃花坞木刻年画，大英博物馆 因为雕刻技法多样、题材丰富多彩个特点，“苏州桃花坞木刻年画”搭天津杨柳青、山东潍坊杨家埠、四川绵竹齐名，并称为全国“四大年画”。 如今，虽然我个身浪拆仔又拆、修仔又修，我还是搿个桃花坞，姑苏城里最标致个桃花坞。 倷看刚刚过脱个一礼拜，苏州国际设计周就勒我个地皮浪办得如火如荼，全世界个设计师侪聚集勒该搭。作兴我要跟仔苏作手艺一淘，走向世界哉！  文章 | 叶嘉剑 改写 | 予安 排版 | 彦兮 |
|
|
