|
上海老底子每天呈送精彩文章一组 打开尘封的记忆，寻觅往昔的岁月
叙上海老底子事 忆上海老底子人 诉上海老底子情 大百万金和万仰祖 原创：老周望野眼 作者：周力 改写：郭莉 诵读：郑玮 审阅、推荐：丁迪蒙 编辑：王乙其 （上） 我手里想拿个，是张历史照片。讲起搿张照片，一批老上海板是津津乐道个。照片里向有得九个人，其中八个是演员，名字报出来个个响亮：蒋月泉、刘天韵、徐云志、徐绿霞、张鉴庭、谢毓菁、张鸿声、张鉴国，侪是当年红透半爿天个评弹大家。居中而坐个是一位身材“夹夹壮壮”个年轻人，浅色个西装、头势清爽，眼神坚定、邪气自信，迭个是啥人呀？呶，伊就是当年上海滩著名个沪语广播主持人万仰祖。
照片是二十世纪四十年代风靡上海个广播评弹节目“大百万金空中书场”个“周边”，赠送拨忠实听众个礼品，所以照片浪向还印了“大百万金空中书场赠”几个字，右上角还有只钢印，圆圈圈里向是一只美元个标记，迭个是当年由华明烟草厂出品个“大百万金”牌香烟个商标。
二十世纪四十年代，上海私家电台林立，所以除脱书场，电台也成为了说书先生个重要“码头”。当年以评弹节目为特色个广播节目交关多，但是影响最大个，还是“亚美麟记电台”节目搭仔“大百万金空中书场”。“亚美麟记”是由亚美电台跟国华电台合并出来个，前身之一亚美电台创办于1929年，是私营电台里向历史最悠久个“老牌子”。亚美麟记创始人之一陈子桢个后代陈治文先生，回忆搿段历史辰光，伊搿能讲：“当时，另外一家广播电台聘请了著名主持人万仰祖，主持了一档叫《百万金空中书场》节目，由于主持得邪气有特色，所以吸引仔大量听众……后来有人做过一次调查，讲上海听众因为欢喜万仰祖，所以比较倾向于收听《百万金空中书场》，但是亚美麟记广播电台是覆盖上海搭仔江苏、浙江大片地区个，所以听众邪气广泛……”。从迭个《大百万金空中书场》竞争对手个闲话里向，大家可以分析出：《大百万金空中书场》勒上海受欢迎程度，是远远超过亚美麟记个，评弹是一样个，但是“大百万金”有得沪语节目主持人万仰祖，当时主持人叫“报告员”，迭个报告员是节目成功个关键。一个身材敦实个年轻人，就是有搿能个魔力，搿能个噱头。
万仰祖（1919-2005） 万仰祖，迭个“夹夹壮壮”个年轻人，几乎就搿能以一己之力，创造了“大百万金”个节目品牌。伊一没读过啥个传媒学院，两呒没学过啥个朗诵发声，顶早个播音名字叫“万阿狗”，搭现在主持人起名字侪显得老有文化、是完全勿一样个。老上海人家叫“阿猫阿狗”个勿勿少少，名字贱，养起来便当省力，只要人登样就可以了。要是自家长得勿登样，再叫啥好名字又有啥用场！ （下） 1949年以后，万仰祖进了上海人民广播电台，成为了沪语播音个老祖宗。伊个代表作就是“阿富根”，勒上海，阿富根真个是家喻户晓。大概有人会得奇怪：上海是国际化大都市，哪能最红个电台播音员，名字土得搿能个一天世界呢？其实，勒大上海，阿毛阿狗阿富阿根，比叫洋名字个人要多出造造反反唻！只有拉牢伊拉，再是真正拉牢了上海个“流量密码”。
万仰祖一生从事评弹节目主持，但是伊一开口，侪是上海闲话。我觉着，要伊来两句苏州闲话，一定是笃悠悠没问题个。但是，万仰祖坚持沪语播音，也坚持自家“上海人”个身份。而评弹，毕竟已经从苏州走出来，到上海以及更加广大个杭嘉湖吴方言地区了。 除脱万仰祖个主持魅力，“大百万金”个营销手段也邪气高明，现在商家用来“吸粉”个手段，伊歇辰光就已经有了。文章开头讲到个演员照片，就是“大百万金”发放拨听众个“福利”。侬想得到照片，就需要集齐交关香烟壳子，客观浪也促进了产品个销量。资深听众还好得到更加高级个赠品，譬如《大百万金开篇集》，迭个是云集了众多弹词名家，拿伊拉勒电台里唱过个节目整理成册，专门供听众收藏个，也让听勿懂唱词个听众，勒欣赏节目之余，好更加深入了解其中个文化。
现在看来，《大百万金开篇集》保留了众多节目个原始资料，其中交关节目因为种种原因，已经有得几十年呒没勒舞台浪出现过了，迭眼赠品就为后世艺术家整理、恢复传统书目提供了最原始个文本，真个是善莫大焉！当年编迭眼物事个人，自家一定也呒没想到过。 讲了介许多“大百万金”搭仔万仰祖，主要还是因为昨日勒天蟾逸夫舞台，欣赏了上海评弹团推出个“大百万金怀旧金曲集萃”。“大百万金”迭个ID旧年就勒城隍庙伊面个“海上梨园”演出过，受到广大听众欢迎。现在勒勒天蟾逸夫舞台演出2.0版，演员阵容堪称豪华，节目也更加多更加精彩了。像已经失传个《周瑜托梦》，经过重新谱曲排腔，姜啸博用杨调来唱，荡气回肠。有意思个是，姜啸博从微博时代兴起开始，就用“大百万金”作为自家个网名，可见搿趟伊对搿本书、搿套节目有几化深个感情。已经退休个徐惠新上台搭听众打招呼：“长远弗见，想念大家。今朝来听书个朋友，码侪是验过个，侪是绿个，弗容易啊！”听众报以热烈掌声。 唉！上海人，侪听得懂搿句个意思个呀！
作者：周力
诵读：郑玮 迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
丁迪蒙所撰写的，与沪语相关的著作主要有： 《学说上海话》上海科技文献出版社 《听听说说上海话》少年出版社 《实用沪语》复旦大学出版社 《上海话绕口令》少儿出版社 《上海方言词语使用手册》上海教育出版社 《上海话读成语故事》少儿出版社 《囡囡学童谣》，少儿出版社。
转自：“海上梦叠”公众号 |
|
|
