【沪语悦读】淮海路浪个淮海公园

zzm1008图书馆 2022-10-27 发布于上海

展开全文

上海老底子每天呈送精彩文章一组

打开尘封的记忆，寻觅往昔的岁月

叙上海老底子事 忆上海老底子人

诉上海老底子情

淮海路浪个淮海公园

作者：袁念琪

改写：周红缨

讲述：安娜

审阅、推荐：丁迪蒙

编辑：王乙其

（上）

走勒勒淮海路搭仔南京路搿两条有名个商业街浪向，侪好看到公园个；但是，公园个名字源自于路名个，只有淮海中路177号个淮海公园。就勒同一条淮海路，1008号个叫“襄阳公园”，之前叫过“林森公园”，迭个倒是取自伊个辰光个路名“林森中路”，搿是淮海中路从前个名字。而勒南京路，南京西路231号个公园也勿叫“南京公园”，却是喊伊“人民公园”。

上海个公园勿少，来源好分四类：一，从私人花园演变而来，二，原租界所造，三，解放之后新建，四，墓地坟山改建。淮海公园就是脱胎于八仙桥公墓。

1843年（清道光二十三年）上海开埠之后，勒上海定居个老外逐年增多，人生自古谁无死，老外也一样。开埠第二年，上海就出现了老外办个第一个公共墓地——山东路外国公墓；上海人叫“外国坟山”。“谁浇杯酒到棠梨，强弱同埋绿草畦。七万里人三尺家，旅魂归否大洋西。”（六勿山房主人《申江百咏》）

勒八仙桥地区，公共租界工部局先造公墓。1865年（清同治四年），以规银四千两买了现在淮海公园中部、南部搭原南市区体育馆搿个3.4万平方米地块。三年之后建成公共租界新公墓，后来叫八仙桥公墓。公共租界个公墓造勒法租界里，也算是块飞地了。

公墓落成两年之后，法租界公董局勒伊个北面买1.45万平方米地做邻居，勒1871年（清同治十年）建成法租界新公墓，后来也称伊为八仙桥公墓。勒迭只公墓里，有新北门迁来个法兵墓，立墓为“纪念因激于公义与人道而攻打侵犯上海城之盗匪，于1855年1月6日为国争光而阵亡诸法人。”13个法军，配合清军攻打上海县城里个小刀会而阵亡。

万国公墓

一条马路从八仙桥由北向南通向公墓，公共租界叫伊坟场道，法租界叫伊公墓街，上海人叫伊坟山路，就是现在个龙门路。两只八仙桥公墓共总有得4339个墓穴，老外占到93%。因为法租界墓地面积只有公共租界个一半，三十四年之后就客满；公共租界个公墓则是到1925年满穴。

勒晚清出版个黄亦埙个《淞南梦影录》里，对“外国坟山”是迭能讲个：“西例饰终之礼，俱从简略。……既葬，即平其土，不封不树，惟立一小石碣，书其生平事迹而已。”上个世纪80年代到浦东公园拍照片，看见树丛里个老外墓，简单得就像黄亦埙描述个一样。

“外国坟山”勒霞飞路现在个淮海路浪，勿妨碍商家沿路从东往西蔓延，也勿影响搿条商业街形成。1918年，日商勒“外国坟山”东面开卖皮鞋个高岗洋行。六年之后，中国人勒搿条马路开了第一家皮鞋店——文安皮鞋店。到迭个辰光，商店已开到了葛罗路，现在个嵩山路；可以讲，从八仙桥地区发展而来个商业街已经浮出水面了。

1940年代的八仙桥公墓

拿八仙桥公墓改成公园个提案，出现勒1956年8月上海市一届人大常委会第9次会议。拿“丛树阴森外国坟”改公园是有道理个，因为伊拥有较好个绿化。“绿树荫浓，不见天日。虽曰义冢,亦一清净世界也。”（黄亦埙《淞南梦影录》）勒八仙桥公墓，种悬铃木、香樟搭仔罗汉松等，其中有一棵瓜子黄杨搭两棵广玉兰个树龄勒百年以上。造公园，绿化只需要稍作调整搭仔充实。

1956年12月12日，上海市政府第27次市长办公会议决定，由市人委发沪会厅议字第5740号《通知》：以市建委为主，召集市民政局、市园林管理处搭外事处等筹建公园。第二年6月，报纸浪刊登迁墓公告。

（下）

两租界八仙桥公墓占地面积，当时为3.53万平方米，原计划全部改成公园，后来考虑当时个邑庙区呒没体育场；市人委1958年1月8日批准拿“外国坟山”个2.67万平方米改成公园，其余个8600平方米建体育场。2月6日，八仙桥公墓个全部坟墓迁到青浦吉安公墓，“外国坟山”个历史宣告结束。

3月17日，投资16.74万元个建园拉开大幕；负责规划搭仔绿化设计个是市园林管理处设计科陈丽芳，负责施工个是市园林管理处绿化工程队；工程于6月20日竣工。公园东起普安路，西到南市区体育馆搭嵩山消防队；南起太仓路，北至淮海中路；呈J形。前门开勒淮海中路，是正门；有个后门勒太仓路。7月1日对外开放，副市长赵祖康参加开园式。

公园勿大，勒上世纪90年代后期，面积为2.63万平方米，面临淮海中路个一侧缩进去勿少。2009年再次改建，面积约25000平方米。公园小，看来还是先天勿足，受前世“外国坟山”个限制。

“外国坟山”变身公园，笑嘻嘻替代了哭出呜啦；勿单单是笑比哭好，更加是为淮海路和搭仔迭座城市增加了一颗绿肺，改善搭仔提高了生活环境。虽然淮海公园道路地坪面积个27.34%比例比一般公园大，但绿地还是占了总面积个63.67%。

记得公园里向大兴土木是勒1970年，勿是改造升级，是挖防空洞造地下长城。埃年4月1日召开个中共“九大”提出“要准备打仗”，随后开始全国挖防空洞。之前个1969年3月2、15搭仔17日，中苏勒黑龙江省虎林县珍宝岛发生三趟蛮大规模个武装冲突。我读书个茂名南路第二小学，组织到淮海电影院看纪录片《珍宝岛不容侵犯》、《新沙皇反华暴行——苏修在乌苏里江、黑龙江上的挑衅》：苏军巡逻船冲撞我伲个渔船，用高压水枪喷射渔民。江水结冰之后，坦克越过边界横冲直撞，我边民用木棒自卫反击……

据1970年制定个《关于上海市构筑人民防空工事的规划》，市区600万人加郊县城镇70万，需要新建人防工事170万平方米。我伲住个花园也开膛剖肚，完工之后是；园子里个草没了，多了几只露出地面个通风口。同样，淮海公园个道路、下水道、绿化咾啥也损坏严重。据《卢湾区志》：“1970年8月至1979年11月，在淮海中路一条街修建改建平战两用人防工事33处，使用面积2466平方米”。勒现在淮海公园靠普安路个东南部，有座南北长约125米左右东西宽约25米、占地3100多平方米个假山，山下头就是防空洞。

虽然住勒淮海中路旁边，去得最早、最多个是复兴公园，是因为离屋里近。从住个茂名南路163弄往东，穿过相通个瑞金二路48弄，出来对牢仔皋兰路，走到底就是公园个边门。从屋里到淮海公园，也从48弄出来，沿瑞金二路往北到淮海中路小转弯，朝东一直走。看到115号淮海花店个玻璃房了，公园就勒眼门前了。

淮海公园虽然去得少，但勒1985年1月却是去过好几趟。进园采访工人收藏家张其斌，伊借公园个展览馆办收藏展；著名画家颜文樑为弟子题了展名。之前，公园里还办过赵丹个书画展。

埃个几天，张其斌搭妻子戎雪芳忙了布展。伊屋里住勒勿远个桃源路，15平方个房间里，有得藏品1000多件，平均每平方超过66件。伊15岁学画，到王佐佑画室学素描、到哈定画室学水彩；从画静物爱上了收藏。伊勒淮海公园展出收藏个德、法、英、美及瑞士等国家个古钟300多座，陶瓷工艺品500多件；还有勿少风格迥异个灯具，其中印象最深个是60公斤个火枪手达达尼昂落地灯。介许多珍贵精美个藏品，而公园夜里向呒没人，我还真为伊担心。

为方便联系，还记下了当时公园个电话：282716。