【沪语悦读】去鱼头王店吃酱汁肉

阿拉老底子每天呈送精彩文章一组

打开尘封的记忆，寻觅往昔的岁月

叙老底子事  忆老底子人

诉老底子情

去鱼头王店吃酱汁肉

作者：沈一珠

讲述：李国琪

推荐：丁迪蒙

音频制作：沉默是金

写迭篇个辰光，正好从网浪看到一家之前吃过个饭店出了一篇推文：一块有情怀个酱汁肉。 

文章一开头就讲，苏州人勿时勿食，即使日日有、天天吃个肉，也是有时令变化嗰：春天酱汁肉，热天粉蒸肉，秋天扣肉，到了大冷天就是酱方了。至少勒伊拉个饭店里，搿几块肉出现个辰光是勿会弄错个。 

其实，我搿趟要讲个是另外一家鱼头王饭店。 

第一趟去，本来想请几个朋友一道去吃七宝鱼头王，结果有人坚持要到迭家鱼头王店，因为吃过，觉得味道好。结果就去了，哦哟，生意好得来，两层楼饭店，吃客是潽进潽出呀。第二趟，是另外个朋友约个，地址发来一看，又是迭个地方。迭位朋友住淮海中路，专门到西部比较落乡个迭家饭店来，也是听朋友个朋友介绍。看上去，已经有点“酒香勿怕巷子深”个意思了。 

到底阿里爿饭店好，倒勿好乱评论，只好讲，到迭爿店吃鱼仪式感老足个：一条廿几斤重个鱼拎出来拨㑚看，吃客同意，再一鱼四吃：先剁椒大鱼头，再一盆雪雪白个鱼头汤，一大盆熏鱼，之后，再来碟浓油赤酱个红烧划水。配套点心是一大碗韭菜小阔面，剁椒鱼头个汤水拌勒海，邪气入味个。 

其实，七八个人点一条鱼就够了。只不过，一条鱼从处理到四样花式烧好端上来，需要一段辰光，所以，还是点了几只菜热热身，喏，就碰着迭碗血血红、、糯笃笃个酱汁肉了，是春天里个胭脂红，跟之前“有情怀个酱汁肉”也算是有个呼应。 

关于酱汁肉个烧法，前两年去吃饭辰光，老板倒是原原本本讲过一遍。只不过，大家侪懂个，就算仔仔细细讲拨侬听了，侬也勿见得烧得出伊个味道来。所以，屋里烧菜，味道有个七八分像也就可以了。想想，一家饭店个生意好，总归是有道理个。 

酱汁肉个食材：五花肉1斤、红曲粉、黄酒、桂皮、八角、葱、姜、盐、酱油、冰糖。 

做法：先拿五花肉整块汏清爽，摆到镬子里像焯水，捞出来，汏清爽、沥干，切成1寸左右个方块、备用。肉块倒进镬子，加黄酒、桂皮、八角、葱、姜、酱油及红曲粉调制好个汁，拿肉浸没，大火烧开，滚脱一歇歇，加冰糖，再转小火焖到酥烂。出锅之前开大火收汁，拿葱姜等配料搛出来，就可以盛出来吃了。

（摘自《新民周刊》第7期）

作者：沈一珠

讲述：李国琪

配图：网络  /  编辑：渺渺

来源：“上海言话讲起来”公众号