|
苏州的糕团店
过重阳日，亦听见侪浪讲苏州风俗，吃重阳糕。
听说三元坊书院巷里还有一爿糕团店新开，媒体浪侪介绍生意哪哼哪哼好法。
朆去看！勿觉着啥稀奇。
浪五丶六十年门前，苏州城里格糕团店，覅忒多啊！
就象现在一改开，侪讲"银行比厕所多，厕所比米店多"。
以前苏州，米店比厕所多，糕团店比米店多。
格歇辰光，苏州城里厢，街头巷尾，隔格三四百米就会有爿糕团店。
就讲阊门中市大街浪，二三里路，从城门口到接驾桥，就有五福来丶万福兴......五六爿。
糕团勒笃苏州，曾经是饮食业当中一个大行当，比面点业生意大得多。
不过，格辰光格糕团店，只蒸糕蒸团子，不卖有汤有水格点心。行当分得蛮清咯，不会隔行抢生意。汤团，汤团店做，面勒馄饨，由面店勒馄饨店卖，各有所专，互不侵犯。
糕团店门面蛮简单，单开间多，一只曲尺柜台，一排木架。
前店后坊，里厢作场也勿复杂，一块作台板，一付大灶头。
糕团店早市做点心，现做现卖。从后头作场里，现制现蒸格猪油糕丶黄松糕丶行糕丶条头糕丶糖钎糕丶刺毛团，整板或整匾，端到柜台浪或上架，现切现卖。
万福兴弯辰光还勒都亭桥堍浪，桂香村斜对过。
早浪头，常看俚笃店里伙计娴熟地把整板热吹潽烫猪油糕用刀切成条，切成块，拿荷叶爿一托，传到吃客手里。噶格香么，赛过现在还浪鼻头边。
不象现在，侪是冷冰冰格，热气阿呒畀一滴滴，吃勒浪闷注注。
格歇格糕团店，大生意覅勒早浪头。
苏州人家养小囡满月剃头周岁丶上学升迁丶嫁女娶媳丶做寿丶造屋丶搬场乔迁.....哪桩事体少得忒糕团。
糕团店格大宗生意，就勒一年四季周边人家格红白喜事浪。现在行送只奶油蛋糕，格歇辰光办事体，担盘送格侪是定胜糕寿桃团，一送上百付。该注生意，勒门面浪是看勿见咯。
逢年过节应时，还有糖年糕丶猪油年糕，撑腰糕，青团子，神仙糕，炒肉酿团子......糕团店里格花头经最猛，名堂最多。
要讲江南文化当中格传统习俗，特别勒苏州，糕团可以讲最最有特点哉。
而且勒老里老早，起码讲明朝，就进入专业化商业化哉。所以勒，王鏊啊，文震亨啊，不少名人诗文当中就有写着哉。
可惜，传统，畀勒计划经济一刀切了。苏州人，现在似乎只晓得黄天源勒万福兴哉，忘记忒仔大清老早出门，随便哪搭侪有格一付大饼夹猪油糕格滋味哉！
|
