|
前阵子屋里向搬场，搬到陌生小区。过日脚除了开门七件事，还要剃头，所以就到各处兜兜，发现此地剃头个花样经也蛮多个。 马路转角是一爿连锁大店，招牌和墙面侪刷成粉红色，大玻璃锃锃亮，门口五颜六色气球扎成拱形，看起来就像辣辣办婚庆。男理发师白衬衫黑领结，女理发师紫红裙高跟鞋。消费以办卡为主，顾客时髦，还让宠物进店。 早上8点，这家店里个理发师侪要到店门前个街面上排队，足足几十号人。我不由得想，要养活介许多理发师，需要多少顾客。后来听邻居讲，伊拉多数是“学员”，是付钞票来学生意个。原来这家店是理发业个“黄埔军校”。 “黄埔军校”每天8点准时出操。操练内容与时俱进，一歇歇是“江南STYLE”，一歇歇是“小苹果”。至于喊口号个架势，有点像“疯狂英语”，周围看热闹个人也蛮受激励个。 有天看见“黄埔军校”隔壁一个单开间门面辣辣装修，招牌浪向写：“古创社”。我想，搿家小店大概是经营古玩书画或者艺术品个。不过当鞭炮响过开业后，发现又是理发店。理发和“古创”搭啥界？我也百思不解。 经过几天考察，发现小区进口处个“小燕理发店”剃头最实惠。小燕姑娘初中毕业后，一把剪刀创业。从露天摆摊，发展到租下门卫室，挂出“小燕理发店”个招牌。门卫室本来呒没门牌号码，小燕自己做一个“888号”，邪气气派。阿拉小区本来最大个门牌号是250，小燕轻松加上六百多号，摘取了“三八大吉”。 小燕手艺勿错，价钿亲民，888号里常常高朋满座，逢年过节要预约。小燕姑娘又养了一只“萌萌哒”贵宾犬，来以狗会友个也不少。 更实惠个，是99号101室，玻璃窗和大门上贴着红纸条：“本室理发，价格2元。”真真便宜。原来剃头匠是个老人，给人剃头只是想找人聊天解闷。伊理发个时间特别长，可以从60年前学手艺一直聊到支内，聊到退休。据伊讲，伊祖上就是剃头匠，后来到船厂当学徒做钣金工，又支援“小三线”。辛苦几十年，兜了一个圈，退休回上海，重操旧业。老师傅剃好头，脚下垫只小凳，从箱子顶取下一面大镜子，照给我看后脑勺发型。迭个才是老上海风度，现在邪气少见。 天气晴好个辰光，小区绿地里还有个本地人理发师，不管有勿有顾客，始终一身白大褂。伊才称得上“老法师”。勿单单着装正规，更讲究卫生。理发前，梳子要先抹一层肥皂水，理发结束，再仔细擦干净，伊讲是要防止皮肤病传染。我对伊充满敬意。 |
|
|
