|
第1种讲法是了1908年迭个辰光，美商环球公司了租界开办了上海第一家汽车出租部，专门为外国人服务。当时出租车计价是按钟头来算个，大概用一个钟头车子要花费一块到五块大洋左右。正因为是按租用辰光长短计价，所以外国人就用包车来称呼出租车，而包车英文名跟汉语拼音文差头读法差勿多。到了1913年，上海陆续开出9家出租车公司，其中有6家是中国人开个，服务对象啊勿再局限于外国人，只要袋袋里有铜钿，侪可以租到车子。当时，上海有铜钿个中国人侪经常了洋人开个场所里进进出出，讲洋泾浜英文就成了伊拉个常态，所以，伊垃需要用出租车个辰光就学外国人个腔调叫一声charter，辰光一长，差头搿种典型个洋泾浜英文叫法就了上海人嘴巴里流行起来。
第2种讲法是老早仔上海个出租车侪是停了车行里个，客人需要用车，或者通过电话叫车，或者直接到车行里去叫车。车行老板或调度员接到客人用车要求，就会派车。派车个辰光老板或调度员就朝司机师傅喊："请侬出一趟差"，而司机师傅接了一单生意，啊叫"出了一趟差"搿里个差是当量词用个。所以讲迭个差字还是伊拉出租车行里向先叫起来个。而"头"了上海闲话里有"带领"个意思，如果侬乘出租车当然是司机开车带侬，啊就是迭一趟"差"个"头"，差头就迭能样子喊出来了。 |
|
|
