|
上海人为啥用“差头”来称呼出租车呢？市面浪向有两种讲法。 第一种讲法是辣辣1908年个辰光，美商环球公司辣辣租界开办了上海第一家汽车出租部，专门为外国人服务。当时出租车个计价是按小时来算个，大概是用一个钟头车子要花费一块到五块大洋不等。正因为是按租用辰光长短计价，所以外国人就用“包车”来称呼出租车，包车个英文是“chartered car”，读音跟“差头”差勿多。到了1913年，上海陆续开出九家出租车公司，其中有六家是中国人开个，服务对象也不再局限于外国人，只要袋袋里有铜钿，侪可以租到车子。当时，上海有铜钿个中国人侪经常辣辣洋人开个场所里进进出出，讲洋泾浜英文就成了伊拉个常态，所以，伊拉需要用出租车个辰光就学外国人个腔调叫一声“charter”，辰光一长，“差头”搿种典型个洋泾浜英文叫法就辣辣上海人嘴巴里流行起来了。 第二种讲法是老早仔上海个出租车侪是停辣辣车行里个，客人需要用车，或者通过电话叫车，或者直接到车行里去叫车。车行老板或调度员接到客人用车要求，就会派车。派车个辰光老板或调度员就朝司机师傅喊：“请侬出一趟差”，而司机师傅接了一单生意，也叫“出了一趟差”，搿里个“差”是当量词用个。所以讲迭个“差”字还是伊拉出租车行业里向先叫起来个。而“头”辣辣上海闲话里有“带领”个意思，我乘出租车当然是侬司机师傅开车带我，侬就是迭一趟“差”个“头”，“差头”非侬莫属。 其实，上海人称呼出租车“差头”还是辣辣改革开放以后，生活水平提高了，乘出租车个需求多了，成了家常便饭以后才时兴起来个。以前，呒没经济条件乘出租车个辰光还是用“出租汽车”来称呼个。要是再向前推进到1949年前后，上海人侪欢喜用“祥生汽车”来称呼出租车。因为祥生汽车是中国人开办个第一家出租汽车行，而且广告做得特别好，所以，祥生汽车就成了出租车个代名词。记得阿拉小辰光看到弄堂里有人结婚，就会跑前跑后唱：2400（叫车电话）打起来，祥生汽车开过来…… |
|
|
