来源：《妙趣横生上海话》
作者：丁迪蒙
改写：丁迪蒙
诵读：顾天虹
08:47
勒聊搿只话题之前，阿拉先来看看搿几个字个字音：
“鼻头”的“鼻”和“笔头”的“笔”，
“北面”的“北”和“单薄”的“薄”，
“滴水”的“滴”和“笛子”的“笛”。
侬可以感觉出来伊拉搭普通闲话个读音有啥个勿同伐？
各位想想看，搿些字勒上海闲话里向侪是发邪气短促个音个伐？搿种老短促个音叫做入声。
啥个是入声呢？阿拉可以从源头浪去分析。
勒中国古代，汉语也是有四只声调个，但是伊拉搭现在个普通闲话勿同，当时是四只声八只调：葛就是：平、上、去、入，而且是各分阴搭仔阳个。
由于北方地区语音变化邪气大，现在普通闲话个声调叫做“三声四调”——阴平、阳平、上声、去声。也就是俗称第一声、第二声、第三声、第四声。只有平声还是分阴搭仔阳个，上声搭仔去声呢，已经勿分阴阳了，还有只入声，勒北方方言区里已经是完全消失了。
葛末，伊些入声到啥地方去了呢？原来啊，伊拉分别进入了其他个声调里向。譬方讲：
“哭、出、突”，用普通闲话读侪是阴平声，也就是第一声；
“国、革、独”，用普通闲话读侪是阳平声，也就是第二声；
“谷、笃、百”，用普通闲话读侪是上声，就是第三声；
“玉、绿、鹿”，用普通闲话去读是去声，就是第四声。
但是，搿些音只要用上海闲话去读，就可以晓得，伊拉个发音侪是邪气短促个，搿些进入了普通闲话其他声调里向个就是原来个入声音个字。
勒北方方言区里已经完全没办法从声音浪向去辨别个声调，却依然保存勒一些其他个方言里向，譬如粤方言、闽方言，还有阿拉吴方言。上海闲话是吴方言个代表方言。因此，阿拉讲方言是活化石，通过方言阿拉可以了解到古代个发音情况。上海闲话里完整个保留了两只入声：阴入搭仔阳入。上文个“笔”搭仔“鼻”，勒上海闲话里发音是勿同个，一个清、一个浊。
汉语个语音美感主要表现勒勒两对对偶关系浪：平仄搭仔舒促。
一、平仄。
所谓“平”指个是平声，包括现在普通闲话里个阴平声搭仔阳平声；所谓“仄”就是上声、去声搭仔入声。平仄呢，现在个普通闲话还可以分辨，只有入声部分因为进了阴平搭仔阳平而使得北方人已经没办法分辨了。
古代个诗文侪强调要调“平仄”，因此，就有了“平平仄仄平平仄，仄仄平平仄仄平”。假使勿是搿能来写诗词，就是勿合平仄，就缺少了美感。
二、舒促。
所谓“舒”，指个是平声、上声、去声，伊拉个发音特点是宽缓舒展，辽远娴静，是长音；所谓“促”，就是入声，伊个发音特点是急促剧烈，烦杂激动，是短音。
假使拿舒声比作音乐声当中个全拍，促声就只占了半拍。舒促相间，勒语音浪就具有了类似切分音个节奏感。舒缓、平静个舒声搭仔短促个入声夹杂，舒促相形、长短相间，时舒时促个诵读就极显韵味，构成了汉语个音韵美。
以往，符合平仄、舒促规律个诗词假使用普通闲话去诵读就常常觉着勿合，因此，勒语音个美感浪向是有所缺失个。今人、特别是北方人由于入声呒没了，对古诗文个语音赏析就会受到一定个影响。搿种情况，勒上海方言里就勿会出现。
阿拉来看上海闲话“勿晓得”。“勿”、“得”侪是入声，半拍；而“晓” 则是舒声，全拍，搿就形成了切分音节个感觉。
再譬如“风雪百年”搿四个字，从平仄个角度看，侪是平仄仄平，北方话、粤语、吴语侪是相谐个；但是，假使从舒促个角度来看，北方闲话全部是舒声，而粤语搭仔吴语则是舒促促舒，因此是更加具有语音美个。
回过来再看“笔、鼻”，“北、薄”，“滴、笛”搿三组音，前者个声母侪是清辅音，属于阴入声，而后者个声母是浊辅音，属于阳入声。声调勿同，意思也就完全勿一样了。假使讲“伊笔头好”，是讲搿个人能写，写文章邪气好；而假使讲“伊鼻头好”，意思就是迭个人个鼻头特别好，嗅觉邪气灵敏。大勿同了伐？
