|
现在个上海，大概只有崇明还有人养羊，郁飞告诉我，伊个农庄保持古法养羊个规程，喂农庄里个青草、粮食，养足一年，羊肉营养价值高，味道鲜润。农庄养个鸡、鸭也是遵循绿色食品标准。开饭店做生意要凭良心，再能赢得回头客。老上海商家个美德要发扬光大，郁飞要让来道道鲜个所有客人吃得美味、健康、安全。道道鲜个特色招牌菜红烧羊肉砂锅，用崇明特产白山羊，肌肉丰满，肉鲜皮细，富有胶原蛋白。迭与白米虾、老白酒、白扁豆统称为“崇明四白”。一般老崇明烧个红烧羊肉侪是浓油赤酱，放糖收膏，色相黑里透红，油脂包裹，上海人叫重口味。从前呒没冰箱，迭能烧羊肉可以多摆几日天。现在，道道鲜个羊肉砂锅吃口清味，羊肉笃得恰到好处，一碗上桌，色彩清亮，皮嫩肉酥，一口羊肉，一口崇明老白酒，让侬个舌尖细细叫分辨出崇明本地羊肉鲜香勿膻个美妙滋味。 招牌菜之二是白切鸡。夹一块往嘴巴里向送，散发出鸡肉个香味道。我吃过各种白斩鸡，大多数鸡肉偏柴，味道淡，迭只崇明鸡生活勒岛浪，一生享受阳光、蓝天、白云、海风，吃个是林子里个小虫，长得蛮壮，鸡肉个纤维有弹性，脂肪丰润，迭就是从前上海人过年吃鸡个老味道呀。 河豚鱼上台子了，夹一筷勒冰浪向个透明个生鱼片往火锅里向烫一记，蛋白质一记头凝固牢，吃个辰光好像是一片白云飘到嘴巴里，习习嫩。再夹一筷洁如美玉，浸勒白汁里个鱼肉鱼肝尝尝，咦，口感丰满，鱼肝软柔，鱼肉肥美，感觉是口福满满呀！吃一口浓稠个河豚鱼汤，蹦一个“鲜”字出来，是眉毛也要鲜脱个呀。有句老话叫“拼死吃河豚”。勿要急，我吃个是人工养殖个无毒个河豚鱼。大厨讲：“迭是养殖个菊黄河豚鱼，比其他地方常庄吃个暗纹河豚鱼体形小眼，肉质更加鲜嫩。” 海鲈鱼有多种烧法，毛豆清蒸暴腌鲈鱼段、鱼头，咸汁鲈鱼块。野生海鲈鱼勒海里向搏击海浪，鱼肉有阳刚之气，经过腌渍之后鱼肉紧，特别鲜，是春季补肝肾、健脾胃个佳味。 到搿搭来，鮰鱼还是要点个。上海本帮菜红烧鮰鱼，味道肥腴软糯，咸中带甜，皮下胶脂多。入口辰光，鱼肉鲜嫩，鱼皮黏糯，有类似胶着“拉黏”个感觉，大厨拿鮰鱼个美味表现得淋漓尽致。 特色热菜“霸王别姬”，别有味道。西楚霸王项羽与虞姬永别，“姬、鸡”同音，甲鱼又叫“鳖”，搭“别”音似，“霸王别姬”由此而得名。搿道菜用个是浙江大型水库里个半野生菜花甲鱼，老母鸡则是道道鲜自家农场个散养鸡，属于当令时鲜。 到了道道鲜，寻找老味道，崇明私房菜，样样侪好吃，青壳螺蛳河蚌肉、咸菜笋丝小豌豆、鸡毛菜里百叶丝、金花炒饭甜酒酿、刀鱼馄饨草头饼、热炝河虾炒蚕豆、糟烧带鱼面丈鱼、咸肉百叶臭豆腐……只恨自家胃忒小，改日再来侪吃一遍伐。 |
|
|
