|
敬告家长：维持方言能力对囡肆大有好处
▲yuko酱 摄于石公山  随着学堂普通话教学个强势推行，现在交关家长侪不theh囡肆蜪话方言啧，认为话方言会干扰囡肆对普通话个学习。递个可能是一个误区，最终不一定有能达到目的，反倒会削弱囡肆本来应该天生具有个能力。实际上，维持方言能力对囡肆大有好处垃许。挨下来，我就分不同个方面为大家解析。 一、 汉语学习方面 1． 对学习古汉语个好处 可能交关人侪认为自家个方言母语土透土透，不登大雅之堂，gah实不是寔恁个。各地个汉语方言侪是古汉语个继承者，其中有交关古语。以我伲汉语第二大方言吴语为例，平常脚话着个交关言话侪包含着古汉语个成分，譬如：今朝、明朝、上昼、下昼、归来、归去、若然、若是、斫稻、斫麦、何上、何里、烂勚、烊勚、殟塞、𩑦杀、镬子、镬㔶、蹄髈、𩔈肉、新妇、䶕牙、疰车、疰夏、豪𢜶、搛菜、閛门、埲尘、饭䊓、齾口、着衣裳、净衣裳、㫰衣裳、揿牢定、囥物事、滗汁水、鐾刀布、𨒃野猫、𧼱苗头、䞁长短、齆鼻头、妗格格、冰冰瀴、渳渳醪酒、𡬍脱一歇、隑垃门上、𨂝𨂞不动、溚溚渧渧、繗繗补补……可以讲是比比皆是，其中个一部分就有可能塱小学到大学个古文里碰着。 交关人侪有寔恁个感触——读书个辰光看见古文就头大，递种感觉从一定程度上讲是因为现代汉语相对古代汉语来讲发生著较大个变化，现代人对古汉语缺乏直观个感受。毕竟，以北京言话为基础个普通话，传承着个古汉语是有限个，若然只以递个基点去理解古汉语，局限性是显而易见个。但若然佷对自家个方言母语原有一定个使用能力，佷对古汉语个理解就多著一个维度，因为垃不同个方言里保留个古汉语成分不尽相同，有个成分可能邋北方言话里已经不用啧，但塱其他方言里还有保留。特别是几大南方方言，虽然看上去theh普通话个基础方言北方言话大不一样，但可能保留著还要多个古汉语成分，递个theh历史上汉人大规模朝南方迁徙有关系。譬假讲现代普通话称为“锅子”个物事，南方个吴语里有“镬子”个叫法，再朝南个闽语里有“鼎”个称呼，递个gah实就是镬子递样物事塱汉语不同历史时期个不同名称，个么可能对于闽语区个人来讲，看见古文里个“鼎”就可能直观个认识着是“镬子”个意思，对于吴语区个人来讲，看见古文里个“镬”就晓得是“镬子”，也就是普通话讲个“锅子”。 还有譬假讲古汉语知识里常庄提着个“去”是“离开”个意思，佷若然单立足于普通话个说话可能蛮难理解，但垃佷个方言母语里递种意思蛮有可能原旧保留垃许。譬方吴语嘉定言话离开个辰光可以话“我去啧”，递个“去”就是保留著古语“离开”个意思，因为垃语境里佷可能根本朆话人家听佷到何上去，只是表示离开个意思。 还有譬假讲古汉语里出现个“水上”“河上”，表示个是河岸上、塘浒上个意思，不是河里、水面上个意思，递个意思垃一排方言里乡原旧保留垃许。譬如吴语嘉定言话里“我垃黄菇塘上种著点芋艿、番芋”“老早娄塘河上条路烂透烂透”，侪是表示个是黄菇塘、娄塘河个塘浒上，保留著古汉语个用法。 个嘞，千万覅当得乡下老人用语不规范，塱𠍲𡍲个言话里蕴藏着大量古汉语个信息，佷若然用普通话个眼光来看方言，会误认为方言侪是不规范个物事，但佷忽略著，用普通话来看古汉语，有交关物事也是难以理解个，而交关方言里看似不规范个物事theh古汉语里看似难以理解个物事，实际上蛮有可能是一脉相承个。虽然现代汉语所有个方言相对古汉语来讲侪有著一定个变化，但古汉语个特征原垃𡍲各种方言里或多或少个保留垃许。当交关人为“古今差异巨大”而对古汉语大为头痛个辰光，殊不知，古汉语gah实就活跃垃我伲个口头，当佷用自家活生生个语言去理解尘封已久个古语，比起呒不切身体会个死记硬背，递个难度自然就降低著交关。 在外，用方言母语朗读对品味古诗词也大有好处垃许。因为现代各地方言个语音相对古汉语来讲变化情况各有不同，有排特征现代个北京语音是表现不出来个。譬假讲，古汉语分平声、仄声，分舒声、促声，作诗填词个辰光根据当时个语音侪是有讲究个。现代北京语音为此著入派三声，也就是古汉语里发音短促个一类字个声调分别并到著其他几个声调里乡，促声消失，平仄个韵律格局有所打破，个嘞塱有排诗词里就读不出当时辰光个腔调，譬方柳宗元个《江雪》： 千山鸟飞绝，万径人踪灭。 孤舟蓑笠翁，独钓寒江雪。 对于交关平仄、舒促格局朆打破个方言来讲就有能尽可能个接近古代个腔调。南方有排方言甚至拿古汉语个四声八调系统完整个继承著下来，譬如吴方言区个松江、崇明、常熟、绍兴嘞 thin地方，侪保留著古代个八只声调，品读古诗词是再好不过个啧。 外加，古诗词还讲究押韵。押韵个字，垃作者当时个年代韵是一样个，但是语音变化到现在，有个方言里本来押韵个字可能变得不押韵啧，但塱还一排方言里可能原旧押韵垃许。例如大家耳熟能详个《咏鹅》： 鹅、鹅、鹅，曲项向天歌。白毛浮绿水，红掌拨清波。 末脚个“鹅、歌、波”古代是押韵个，但现代个北京音阿末一个字'波’个韵母theh'鹅、歌’不一样啧，不押韵啧，但现代个嘉定言话递三个字原侪押韵垃许。还有譬如陆游个《示儿》： 死去元知万事空，但悲不见九州同。 王师北定中原日，家祭无忘告乃翁。 韵脚是“空、同、翁”，古代当然侪是押韵个，但现代个北京音“翁”个韵母变得theh“空、同”不一样啧，但嘉定言话递三个字也原侪押韵垃许。佷若然碰着用北京音读出来不押韵个诗词，不相用自家个方言读读看，讲不定原旧古色古香，韵味十足垃许。 个嘞，千万覅小看方言，虽然垃交流功能上所有个方言侪呒能theh普通话比，但方言对古汉语个传承功能是巨大个，有能弥补普通话个不足。 2． 对学习现代汉语个好处 对于学习现代汉语，方言也有积极作用，特别突出个表现垃区别普通话里个同音词。为此著不同方言相对于古汉语个语音变化是不同个，个嘞有排古代读音不同个字塱有排方言里可能读音变得一样啧，但塱还一排方言里原旧像古代一样读音不同。利用递种差别，我伲就可以准确个区别不同个字词，若然我伲只懂普通话，只会北京音，个么交关字词我伲就难以区分，就蛮容易写错别字。普通话里交关同音个字词垃佷个方言母语里蛮有可能读音不同，寔恁佷就有可能越加敏锐个体会𠍲𡍲个差别，越加不容易写错脱。例如，下头递量组词语塱普通话里同音，学生子蛮容易搞和脱，但通过吴语可以轻易个从语音上加以区分： 一对 一队 走进 走近 即时 及时 报到 报道 清音 轻音 修养 休养 情节 情结 小节 小结 法制 法治 权利 权力 有利 有力 势利 势力 暴利 暴力 侦查 侦察 唯心 违心 品味 品位 自觉 自绝 做对 作对 形势 形式 个别 各别 地域 地狱 界线 界限 ………… 从小学堂里个教学实践来看，交关囡肆 “做”theh“作” 、 “走进”theh“走近”嘞些儿容易搞和脱，若是𠍲𡍲个吴语基础好点，特别是像长辈一样吴音读汉字个能力不丧失个说话，递种情况应该要好交关，因为递量组词语塱吴语里读音是不同个，原像古汉语一样“进”theh“近”清浊不同，“做”theh“作”长短不同。 若然用普通话个思维思考相关个题目吃不准个说话，完全可以用吴语读读看，可能就要豁然开朗个。看拼音写词语“弄虚作假”，有排囡肆容易写成功“弄虚做假”，但所有方言里保留入声调个人，只要想想看平常脚大家用方言话递个词是哪恁话个，一话就晓得肯定是“弄虚作假”而不会得写成功“弄虚做假”。 还有像选词填空“走进”theh“走近”，只要代到空格里连句子用吴语读读看，马上就会清爽个。 还有一个弄得交关人侪头大个知识点就是“的地得”个区分，之所以头大也是因为𠍲𡍲塱普通话里同音，即使教学生子口诀“白勺是名词，地动山摇，得意忘形”， 𠍲𡍲原旧稀莫弄懂垃许，豆里麦里也搞不清爽，关键问题还是只要语音形式一样，人就容易搞和脱，因为语音个不同是最直观，最具体个，相比起来，教𠍲𡍲“'的’后头跟名词，'地’后头跟动词，'得’后头跟形容词”实在是忒抽象啧。 但是，就像前头话个伊恁，塱北京言话里同音，别个方言蛮有可能读出来原不一样垃许。以吴语嘉定言话为例，横是口语里话着个发teh或者deh寔恁个音，基本肯定用双ngae人个“得”。譬方“𠍲阿跑得快？跑得快个哦！”“𠍲跳得阿远？跳得远个哦！”，个么做题目个辰光，跑得快、跳得远肯定是用“得”。至于带“的地”个词组，嘉定言话口语侪用“个”，譬假讲“美丽的家园”可以翻成功“美丽个家园”，“迅速地包围”可以翻成功“迅速个包围”，但原可以像老人读书看报个恁用吴音去读原词“美丽的家园”“迅速地包围”，有著语音个差别，就容易分辨啥辰光用“的”，啥辰光用“地”。像我伲递排原旧用吴音读书看报个人，一般讲来“的地得”是不会得搞和脱个，因为递三个字垃我伲嘴里读出来从来侪是不一样个。 还有，方言对于理解交关同义或者类义复合词大有好处。譬如：宽阔、狭窄、穿着、寻找、堵塞、坍塌、玩弄嘞thin，递排侪是文雅个书面语词，老师讲课个辰光，可能一般会话“宽阔”就是“宽”个意思，“狭窄”就是“窄”个意思……仔细观察，就会发现，每个词个前后两个语素可能分别塱一种方言里单独使用。譬方普通话讲“宽了些、窄了些、穿衣服、找到了、堵掉了、塌下来”，嘉定言话讲“阔着眼、狭着眼、着衣裳、寻着啧、塞脱啧、坍下来”，普通话讲“玩火、玩水、玩电脑”，嘉定言话讲“弄火、弄水、弄电脑”。 日常生活中使用个词，对于人个体会是最深刻个。对于囡肆来讲，𠍲既会普通话，又会方言母语，𠍲就会晓得，哦，普通话用递个单音节词，我个方言用伊个单音节词，原来递个书面语词就是递两个词拼起来个，意思侪是一样个，寔恁，𠍲对递种同义或者类义复合词个理解不单完整，外加具体、生动。叛恁，𠍲对其中一半语素个理解可能还停留垃抽象状态。 在外，维持囡肆个方言母语，对于𠍲𡍲听懂或者学习现代汉语各种方言也提供著蛮大个便利。可能家长朋友对递个不以为然，认为学其他方言只有娱乐消遣个用场，对学习呒啥帮助垃许，但不相想想看，当囡肆出去读大学个辰光，佷阿是会担心𠍲阿适应伊座城市，其中，语言肯定是一个重要个考虑因素。譬方讲，一个会嘉定言话个嘉定囡，哪怕𠍲只是听得懂嘉定言话，个么，不管𠍲歇两日塱上海还是塱苏州、无锡读大学，𠍲马上或者不消几许辰光就有能听懂递排城市个言话，减少著适应环境个辰光，对于𠍲个大学生活会带来比较大个便利，对于心境自然会有积极个影响，当然也就有利于安心学习。 二、 外语学习方面 1． 对学习日语、韩语个好处 日语、韩语嘞排周边语言深受汉语影响，𠍲𡍲个汉字读音theh古汉语蜪有相当齐整个对应规律。同样，现代汉语交关方言也theh古汉语蜪有相当齐整个对应规律。个么，自然，交关汉语方言theh日韩语蜪也有相当齐整个对应规律，递个就是为啥交关人学日韩语个辰光会发现theh某种方言蜪有点像。譬方前头讲着个古汉语个入声调，塱北方个晋语theh广大个东南各大方言里侪还保留垃许，递个theh日韩语里个相关读音有严整个对应规律，塱递排方言里读入声个，也就是发音短促个个类字，塱韩语里个读音就是以p、l、k寔恁个音收尾个，塱日语里就变成功双音节。因为入声字塱古汉语里就是以p、t、k作为韵尾个，递三套韵尾甚至塱粤语里还完整保留垃许，𠍲𡍲递个特征theh日韩语对应还要严整。外加，粤语嘞 thin theh古汉语一样，鼻音韵尾也分成功前中后三套，分别是m、n、ng。韩语也保留著古汉语个m韵尾，譬方“三”读sam，还有大家耳熟能详个《江南style》，“南”也是以m收尾个，theh古汉语一样。对于还有m韵尾个方言来讲学韩语根本用不着死记硬背个，简直可以讲对得煞齐。在外，日语theh古汉语一样有浊音，吴语也继承著古汉语个浊音，两者之间也是对应个，用不着死记硬背个。 2． 对学习欧洲语言个好处 英语、法语、德语嘞排欧洲语言，虽然theh汉语蜪呒mae亲属关系，也不像日语、韩语个恁深受汉语影响，但是为此著人类个发音原理侪是一样个，就是靠发音器官用各种发音方法发音，个嘞佷母语里个某些音邋别个语言里也有，寔恁，佷学习别个语言，要发递两个音就便当得邪气——佷母语里本生就有好垃许。佷本来就会发个音越多，佷学外语碰着相同发音个概率就越高，个么佷学习难度降低个可能性就越大。 挨下来以英语为例。 英语里有浊音，例如big dog good zoo里个b、d、g、z，吴语里也有递排浊音，如勃、特、搿、词，个嘞吴语区个人发英语个递排音，不单学起来便当，外加发出来到位。不像有个人话成功pik、taok、kot、su，就可能是因为方言母语里呒不浊音，学英语个辰光还是发不出浊音，结果就导致著递种发音不到位个现象。 英语里有长音theh短音个区别，例如sheeptheh ship ， deep theh dip。广大个南方汉语theh北方个晋语也有长短音个区别，譬如吴语“希”theh“吸”，“题”theh“敌”。 还有，英语里有otheh ao 个区别，例如Books theh box，Looktheh lock。有个方言里也有ohtheh aoh个区别，例如吴语嘉定言话“谷”theh“角”，“绿”theh“落”。 为此著大家侪有交关共同特征，个嘞囡肆塱学习个辰光会有交关先天优势，无论是听音还是发音。听说讲外界评价话江浙地区个人英语比较好，作兴，有相当一部分功劳侪要归结于江浙人个母语——吴语。大家也常庄听见话日本人讲英语蛮蹩脚个，递个可能也是因为日语里乡有能发出来个音比较少，个嘞外语里交关音对日本人来讲学起来比较困难。 除脱仔英语，学习其他个欧洲语言也有递种情况，可能交关欢喜外语个朋友侪有过寔恁个惊喜——学法语、德语嘞thin有排音竟然塱自家个方言里也有！ 综上所述，维持囡肆个方言能力，不管是对于学习古代汉语还是现代汉语，日语、韩语还是英语、法语，侪是大有好处个。 对于学习古代汉语有益，是因为方言当中保留著交关古汉语个成分，有不少原旧活垃口头上个古汉语，对于理解古汉语theh品读古汉语作品有极大个帮助。 对于学习现代汉语有益，是因为各个方言相对于古汉语来讲变化情况不同，继承着个成分有所差异，从而对学习现代汉语提供著不同个维度；同时，为此著各种方言侪是从古代汉语传下来个，个嘞相互之间有明显个对应规律theh交关共同个成分，对于囡肆适应就学个城市也有积极作用。 对于学习日语、韩语有益，是因为日韩语theh汉语交关方言一样继承著交关古汉语个成分，使得两者之间有明显个对应规律，可以省脱交关死记硬背个功夫。 对于学习英语嘞thin欧洲语言有益，是因为人类个发音原理是相同个，外语里有排音邋佷个方言母语里场时就有，佷会个音越多，佷学外语碰着相同发音个概率就越高，佷学习外语发音个成本就越低。试想，若然汉语里也有小舌颤音，佷阿会得还为学习有排语言个递种发音痛苦不已呐？ 个嘞，劝告广大个家长朋友，不宜扼杀囡肆个方言能力，尽让theh𠍲𡍲蜪话方言么啧，营造方言母语个环境，递种能力本来就应该是交关自然个。若然为著要讲好普通话咾刻意扼杀囡肆个方言能力，不单得不偿失，外加不一定达到佷想要个效果。现在普通话个语言环境是全方位个，占绝对优势个——电视、广播、学堂教学……可以讲是用不着担心囡肆讲不来或者讲不好普通话个。囡肆塱习得语言个过程当中，若然处于一种双语个环境里，𠍲是会自然而然分辨递两种言话个。但佷若然刻意个只theh𠍲蜪讲普通话，甚至喊老人也theh𠍲蜪讲普通话，个么，𠍲不单损失著一种语言能力，外加𠍲个普通话也不一定就好，因为佷个普通话也不一定傍老师标准，老人个普通话可能还要蹩脚。最终个结果可能只是造成著囡肆只会讲普通话，外加还不一定标准，甚至只听得懂普通话，到阿末脚可能连当适应本地个社会生活也有问题。 会两种言话不等于两种言话侪讲不好，只会一种言话也不等于递种言话就讲得哪恁好。递个就像写字一样，只会写汉字不等于汉字就写得几nyian𡣶，有个人一手怖字写著一辈子。但有个人汉字也写得𡣶，外文也邪气漂亮。递个就像有排播音员、主持人，不单普通话标准，外加方言母语也道地、流畅，听来邪气适意，相信大家一定不会陌生。 个嘞，试图靠牺牲一种言话来讲好还一种言话应该讲是不合算个。再讲，交关家长侪主张自家个囡肆学外语，若然认为话著方言普通话会讲不好个，个么，学著外语，特别是日语、韩语，阿是也会弄得普通话讲不连縴呐？而且，交关家长主张学习外语个一个理由是多学一门语言对于囡肆个智力开发大有好处。个么，若然明白递个道理，我想佷肯定也有能认识着，维持方言母语个能力，自然也对智力开发大有好处，再加上会发个音多，还可以对学习外语提供便利，岂不是一举两得个事体？听说讲国外做过寔恁个调查，发现总体上会两种言话个囡肆傍只会一种言话个囡肆成绩好。 虽然手头呒mae递只调查个第一手资料，但我伲可以用土办法来算一笔账：以北京言话为基础个普通话，有21个声母，39个韵母，4个声调。嘉定言话有27个声母，45个韵母，6个声调。如果声调不去考虑，就用声母、韵母数量相加个方法来看，若然囡肆从小只会普通话，𠍲会发个音只有21+39，共总只有60个介仔，但若然𠍲嘉定言话原会讲个说话，去脱theh普通话一样或者差不多个两个音，保守个算，声母方面起码货会多发8只音，韵母方面起码货会多发25只音，傍只会普通话个囡肆要多会三十几个音，多著一半也宽著嘞！亨孛冷than加起来，既会普通话又会嘉定言话个囡肆会发个音有100个户荡。递个是一笔几许宝贵个财富啊！当然，递种计算方法只是大约摸酌，不算科学，但可以简单个说明问题。 可惜个是，我伲个教育从来朆教我伲语言是啥个物事，汉语是啥个物事，个嘞交关人从来朆拿自家最最本真个方言母语theh普通话、外语放垃一个平面上看，从来侪当得方言就是咦哩哇啦乱嚼一通个不标准个不上台面个物事。乃么佷真个不晓得，语言是抽象个统称，方言么是具体个，一种语言分成功几种大方言，大方言里还分成功小方言，直到一个个具体个地点，大到一座城市，小到一个宅头。不管佷话汉语、英语，还是日语、韩语，佷话出来个一定是其中个一种方言。广州人话出来个是广州言话，上海人话出来个是上海言话，北京人话出来个是北京言话……千千万万地点方言个集合，递个统称么叫汉语，汉语个共同语普通话是以北京言话为基础形成个，实际上也是一种特殊个方言。共同语侪是以一种方言为基础形成个，日语个共同语以东京言话为基础、韩语个共同语以汉城言话为基础。 同样，大家熟知个英式英语、美式英语、印度英语、澳大利亚英语嘞thin也是英语个方言，伦敦人话出来个是伦敦方言，曼彻斯特人话出来个是曼彻斯特方言，纽约人话出来个是纽约方言……至于我伲学个是啥个英语呐，可能也只有能话是中式英语，也是英语递个统称下头个一种变体。 个嘞，覅拿自家个方言母语不当桩事体，各种言话只是使用个范围有大有小，使用个场合各不相同，但就语言个本质上来讲，侪是一样个。每种言话，哪怕小到只有一个宅头个人使用，𠍲也是有自家个一套完整个体系个，语言三大要素——语音、词汇、语法，一样不少。 为著便于理解，拿普通话近似个还原成北京言话，拿佷学个英语，假定𠍲是用伦敦言话作为标准个，拿佷学个日语还原为东京言话，拿佷学个韩语还原成汉城言话，个么，以嘉定人为例，嘉定言话、北京言话、伦敦言话、东京言话、汉城言话，佷学个所有个言话侪是一种具体个方言，从语言个本质上来看侪是一样个。 佷若是认为学北京言话、伦敦言话、东京言话、汉城言话侪有好处，个么话得维持嘉定言话个能力就呒不好处啧？当然，交关家长侪是从语言个适用范围去考量个，个自然不容否认，嘉定言话个使用范围是最狭窄个。但是，可能对于大多数个嘉定人来讲人生当中大多数个辰光侪是塱故乡生活个，即使不塱嘉定，也垃𡍲上海地区或者长三角范围内个。除脱仔普通话普遍通用个交流功能，嘉定言话个文化、社会适应功能可以讲是其他言话侪不可比拟个，因为嘉定所处个上海地区theh苏南、浙北讲个侪是北部吴语，各个地点虽然有差异，但有共通性，有着嘉定言话个基础，听懂本地区其他地点方言个难度降低著交关，不管佷塱上海、嘉兴还是苏州、无锡，母语个共通性侪是佷适应伊座城市个优势。从递个角度上来讲，嘉定言话个实用性甚至远远大于伦敦言话、东京言话、汉城言话嘞thin。 总数讲来，维持方言能力对于囡肆个学习、工作、生活侪大有好处垃许，大家要克服轻视自家方言母语个心理，建议大家平常脚自家theh老人侪尽量theh囡肆蜪讲方言母语，覅让𠍲𡍲丧失递种能力。当佷看不过老人用土透土透个土言话引囡肆个辰光，佷要意识着，虽然老人可能不会外语，连当普通话也讲不连縴，但帮助囡肆学习中外语言theh适应社会文化个密码，就垃塱递种看上去土透土透个土言话里。 希望递篇文章有能为广大个家长朋友带来一点启发。 疁·浏河长江 2013-8-9 礼拜五 癸巳年七月初三 朗读：疁·浏河长江 排版：神死恸瞑 本平台暂未开通评论，大家可至吴语学堂微博留言： 新浪微博：吴语学堂微博 |
|
|
