|
 第二天呢阿拉个目标是Plitivice湖，也叫十六湖啦。前头一天呢房东问阿拉，接下去去阿里搭。阿拉讲十六湖，伊马上讲：哦，晓得了，肯定是九点钟一班。然后阿拉两家头还觉着老刮三个。因为阿拉趁个是前头一班，七点半。阿拉票子呢，高头没任何标志就跟讲阿拉讲阿里只月台上车个。后头呢阿拉去问售票员阿姨，克罗地亚老阿姨个英文哦，大家懂个。老阿姨也晓得阿拉想问啥，直接呢高头写了只月台号头。阿拉根据搿只月台号头去寻呢，倒也蛮方便个。没多少辰光，车子来了。
▌十六湖 车子开了大概两个钟头呢，就到了。到了之后先买票。讲起来阿拉小朋友讲呢，伊讲网高头攻略讲没人检票个哎，还辣纠结要勿要逃票伊讲。结果我一看，要命唻，门口头立了两个人专门检票。好伐？网高头个攻略已经out了，阿拉也覅纠结了，老老实实买票子。一张票子就是一百五十库尼。不过呢搿搭行李寄存是勿要钞票个，方法就是问游客服务处个人拿钥匙，然后放到专门行李寄存个地方。搿十六湖呢是联合国世界自然遗产，人家侪叫伊“欧洲九寨沟”，虽然讲我没去过九寨沟，但搿搭真个是蛮好看个。
搿搭个设施建设也蛮好，厕所间是覅钞票个，还有饮用水也是覅钞票个。讲起来克罗地亚一路里向个厨房间侪是直饮水，就是讲自来水一开出来就好吃个。所以讲呢啥人如果到克罗地亚去买白开水，勿好意思哦，侬真有钞票。就跟去年子个撒哈拉沙漠一样个，我觉着任何讲啥物事，辣海搿介漂亮个景色面前侪是多余个。
阿拉呢先头撑了把洋伞，因为搿天子落雨嘛，撑了把洋伞，还走错地方。不过走错个地方呢，也好个，倒看到了人家一般性看勿到个景色。搿搭个票子呢还有只功用就是去坐景区个交通，景区里向有得船帮景区电瓶车。所以讲呢，如果真个要逃票呢也是有办法个。景区呢因为跟外头个路呢，属于半开放搿状态，完全可以从外头个路进来。但是搿能个言话呢就是走了比较多一眼。我搿天子一共刷了四万多步。
出了十六湖之后呢，阿拉继续阿拉个旅程，叫扎达尔。仍旧是趁大巴车咾。然后搞笑唻，两只毛亲男人，跟售票亭里向个一只毛亲女人，山河茄了老长辰光。当中呢看到一个年纪稍微大点个毛亲爷叔，还拿馋唾水吐辣搿鞋子高头揩鞋子伊讲。后头一个韩国老爷叔，伊正好看到了。噢哟，搿表情真个是，忒恶形了。 眼看辰光过脱了，毛亲是勿急个，当中还每隔几分钟，毛亲老爷叔还去发动只车子白相相。过脱一歇呢，来了一部FLIX BUS。难我看看好像阿拉订个勿是搿只公司呀？再仔细看看，角落头里向微微小几个字，就是写阿拉订票子个搿只大巴公司。大概呢搿家大巴公司拨FLIX BUS公司兼并脱了。然后呢搿毛亲老爷叔拿车子停稳之后呢就坐了后头一部写了本地公司名字个车子，就刚刚搿用馋唾水揩鞋子个搿毛亲老爷叔发动个搿部车子。然后呢搿老爷叔就开了搿先头FLIX BUS公司驾驶员就开了跑了伊讲。 剩下来搿毛亲小男人，长还长了可以个，后头我还问了伊阿里年，伊讲89年个。但是呢，发觉克罗地亚男个有个特点，号称自家勿会讲英文，但只要涉及到某只敏感个方面，噢哟，秒懂哦，而且迅速回应哦。车子来山里向开啊开，最后山呢终于开了，海呢也到了，也就是扎达尔到了。搿小男人呢，阿拉行李票也没收阿拉。然后呢我送伊套套一只，伊兴奋得来勿得了，还帮阿拉提行李唻。 阿拉呢辣扎达尔呢住个是来汽车站附近，阿拉到了以后呢发觉门锁脱个。后首来呢，来邮箱里向呢发觉人家房东其实是发我方法个。但是后头因为阿拉没注意看邮箱嘛，阿拉就到隔壁去寻只old head。勿好意思啊，也有可能是老爷叔，但是老外长了比较老。老爷叔呢打电话拨房东，再讲门口头个密码锁打开之后信箱里向就有钥匙。进门之后房东勿辣海，但是写了交交关关提示，还拨阿拉一只到扎达尔老城个方法。阿拉就朝了搿扎达尔老城进发。
▌扎达尔老城的海边 扎达尔呢是靠近亚得里亚海个一只城市，搿搭最有名个就是老城个海风琴。从宾馆走到老城个海风琴呢，走路是一千米左右。为了看日落，阿拉就拼了命个追了太阳走，然后阿拉小朋友还讲了，因为我跟伊讲，我讲覅紧个，近来死个，只有八百米。伊还讲了，哎，朋友，好像阿拉搿辰光跑八百米，侬跑了老吃力个嘛。噢，好好好，勿好意思啊。我出去旅游两样个噢。不过呢还好，阿拉追了太阳走，终于赶上了。搿景色是蛮赞个。
搿海风琴呢其实是辣海海底个，就跟牢海浪打呢，会得有风琴个声音。所以呢也吸引了交交关关个狗粮。当然咾，最结棍个，当然是天朝个狗粮。为了拍出一张没狗粮个照片，阿拉多少勿容易哦。我都觉着我拍张照片，人家都勿相信我出国了，因为拍出来侪是天朝狗粮。 ▌扎达尔老城的海风琴 阿拉呢还碰着一个一家头出来个，贵州女人。人蛮好个，还帮阿拉推荐伊讲周围又便宜又好吃个餐厅。但是呢，阿拉到门口头看了一眼，发觉好吃勿好吃首先勿晓得，阿拉也没资格讲，因为阿拉没进去。因为价钿忒贵了。
▌扎达尔老城废墟 扎达尔老城呢也是世界文化遗产，但是呢除脱老城个废墟之外呢，一只老城个城门，就只地狱之门嘛，也蛮经典个。不过讲起来，扎达尔老城个调钞票个汇率是蛮好个，比昨日子好多了。因为呢实在没看到啥好吃个，阿拉就回宾馆了，后头蹲辣宾馆附近大卖场里向呢买了点熟食。其他忘记脱了，就记得有得金枪鱼色拉。因为辰光晏了，其他物事侪卖光了。
▌扎达尔老城地狱之门 号称呢路高头我还蹲辣加油站里向化了廿库尼买了张当地卡，隔手搞笑了，勿会用伊讲。搞了半日天，人家侪放弃了。搿两个老阿姨蹲辣埃面讲：I don’t know， I don’t know讲了起劲。只有两个小男人，克罗地亚小男人，因为哎呀，讲伊勿晓得坍招势勿啦？老结棍个帮阿拉弄了搿只手机。最后搞了半日天勿是伊拉只手机卡个问题，是我搿只手机是电信手机，勿支持当地移动卡个。噢哟，难末阿拉总算好了。 搿天子阿拉夜到就吃了搿点大卖场里向买个熟食，罪过伐？ 摄影：小女生施维雅 口述：小女生施维雅 听写：神死恸瞑 编辑：神死恸瞑 本平台暂未开通评论，大家可至吴语学堂微博留言： 新浪微博：吴语学堂微博 |
|
|
